الثلاثاء، 5 فبراير، 2013


الثنائيات فى غناء الحقيبة 
 لقاء مع الفنان علي مصطفى الملقب "بالدكشنرى" أجرته معه صحيفة الصحافة
الفنان على مصطفى هو أحد روآد الفن الشعبي وعضو بإتحاد الأغنية الشعبية لُقب " بالدكشنري" بسبب حفظه لأكثر من 4 آلاف أغنية حقيبة، ومعرفته بأسماء شُعرآئها ومُلحنيها وتوآريخ كتابتها وُمناسباتها.
جلسنا مع "الدكشنري" وأخترنا ليه موضوع "الثنائيات" لإغنيات الحقيبة .. لنتحث عنه فكان أن خرجنا منه بهذه المعلومات القيمة التى تُسلطُ الضو على حقبة هامة من تاريخ أغانى حقيبة الفن :
كلمنا عن ظهور أول ثنائي في فترة الحقيبة، والكلام دا كان سنة كم؟
- أول ثنائي كان بين الشاعر العبادي والفنان سرور سنة 1919م وبظهورهما انتقلت الأغنية السودانية من أغنية (طنباره) الى أغنية حديثة ( حقيبة ) ومن أشهر أغنيات الثنائي:
ببكي وبنوح وبصيح للشوفتن بتـــريح
فرع النقا المميح منو المســـــك بفيح
وكتين صباحنا يبيح بلبل قلوبنا يصيح
* وأول ثنائي غنائي منو وكان سنة كم؟
- أول ثنائي هم سرور والأمين برهان سنة 1922م.
* بعدهم ظهر منو؟
- الثنائي عمر البنا ومحمد الأمين بادي سنة 1922م كانوا بغنوا شعر أبوصلاح وبعدهم الثنائي كرومة وإلياس سنة 1924م كانوا بغنوا شعر سيد عبدالعزيز.
* أشهر ثنائي في الفترة ديك كان منو؟
- أولاد شمبات عوض مصطفى وداعة الله وإبراهيم محمد حسين كانوا ماسكين الجو في البدآية غنوا:
(أذكر بقعة الآمال) و (قلبي المن زمان بهواك) وبعداك غنوا شعر الأمي سنة 1928م ومن أغنياتهم:
(يا رشا يا كحيل غيثني هواك سباني) ، (يا ليل ابقالي شاهد علي نار شوقي وجنوني) و(يا من فاح طيب رياه على ميت الهوى أحياه)، (فلق الصباح قول لي اهو نورك لاح)، و(لحظك الجراح أزآي فيه وفيه الطرب والراح منايا زهرة الافراح)، و (ياجوهر صدر المحافل روحي معاك اتطلفيلا) ، و (قضينا ليلة ساهرة تضمنت محاسن من كل روضة عينة ومن كل عينه زهرة) .
وأولاد شمبات ما أستمروا نسبةً لرحيل إبراهيم سنة 1973م عندهم حوالي 70 أغنية مسجلة .
* ديل أولاد شمبات … أولاد أم درمان وين ؟
- ظهر الثنائي ميرغني المأمون 1910م- 4/8/1986م وأحمد حسن جمعة 1916- 15/12/1982م وهما الأوفر حظاً عندهم تسجيلات كثيرة في الاذاعة حوالي 350 أغنية .
* أشهر اغنياتهم شنو؟
- (اقيس محاسنك بمن يا الدر الماليك ثمن ) و(من حور الجنان ام انت انسان الكمال ام انت الملاك جيت توري الناس الجمال)، (خلي العيش حرام ما دام ارى الموت يحل ما بين الرميش والطريف الكحيل)(الشادن الكاتلني ريدو هلك النفوس والناس تريدو ما لو يرحم مريدو) ، (يا نجوم الليل اشهدي علي لوعتي وتسهدي علي بكاي وتنهدي)، (من قليبو الجافي لي قلبي الحان النسيم يتردد عامل استمحان)، (ضامر قوامك لان قلبك قسي وجافيت ليه يا جدي الغزلان)، (صفوه جمالك صافي الماء علي البلور يسعد صباحك خير) ، و(انا صادق في حبك لو قلبي يتصل إلي قلبك هذا مقصودي) .
* غير أولاد المأمون في أولاد منو في أم درمان؟
- الثنائي عطا كوكو ومحمود عبدالكريم (أولاد الموردة) عندهم كم وتسعين أغنية مسجلة لكن وقفوا بعد رحيل عطا سنة 1979 ومن أغنياتهم:
-(أذكري ايام صفانا والليالي الفيها متبادلين وفانا) ، و(هواك وهواي بي جاروا وسين أفكاري نظراتك أحب تعطف تزيد وجدي وأحب كل البحب ذاتك)، و(غني القمري علي الغصون ذكرني الدر المصون فريد عصرو المامتلو شئ)، و( ياسمير بي نظرتك أوفي الميعاد العيون الشافتك ما اسعدا)، و(ارجوك يا نسيم روح ليه بي اشواقي صرح واذكر صبوتي وسهادي)، و(من اول نظرة رشقتني عيونو وجذبتني فنونو وبقيت مجنونو) .
* الخرطوم ماظهر فيها ثنائي؟
- ظهر الثنائي الطيب الصديق من أولاد بري ومحمد طه من أولاد العيلفون ومن أغنياتهم:
(طال هجري يا ام درمان)، (نفيسة الدر)، (يا حبيبي وين إنت أنا من شوفتك ادمنت)، (يا حبيبي جفيت) .
* في رأيك هل تجربة الثنائيات كانت ناجحة أم فاشلة؟
- ناجحة جداً وأعظم فترة في زمن الحقيبة لأنهم حفظوا الغناء من الضياع وقدموه بنفس الروآيات القديمة خاصة أولاد شمبات والمأمون والموردة لانهم حفظوا القرآن في الخلاوي واتأثروا بالمُداح عشان كدا كلماتهم واضحة وصحيحة وأدآءهم قوى .. حافظين الرواية (اللحن) زي ما هو وقد نجحت الثنائيات لأنهم سجلوا الأغنية في الإذاعة بالرق وليس بالموسيقي فوصلت للمُستمع والمُتلقى وآضحة الكلمات وكانوا يُغنوها في الحفلات بالطبلة وغيرها من الآلات، والأولاد التلاتة بصماتهم وآضحة وعندهم ألحانهم الخاصة.
* غير الأولاد التلاتة ديل هل في ثنائيات تاني؟
- نعم ثنائية قبلهم بين أخطر شاعر عمر البنا وأخطر ملحن وفنان كرومه، عندهم أغاني جميلة جداً زي:
(نعيم الدنيا)، و(في الطيف وفي الصحيان زورني يا حبيبي انا عيان) و(آه الاهيف أبي ما يليم من بعده صار قلبي ضريم) و(هجد الأنام وأنا وحدي مساهر والنحول على جسمي يا حبايب ظاهر هوي أسبابي الحب الطاهر) . 
وهنالك ثنائيات كثيرة ولكنها لم تستمر .
* زي منو؟
- زي الثنائي مصطفي بغداد والفنان عوض درآج، ديل غنوا غنا سرور لفترة،ومن أغنياتهم: 
( عزة وصالك ما لقيتلو مثيل) ، و(عقلي انشغل بهواك والحكمة عيني)، ( ياشادن قول) ، (ما بالنيه)، 
(دمعة الشوق)، (أطرد الأحلام يا جميل واصحى قوم نعدي الليل في ضفاف النيل ننشد الفسحة).
* وغيرهم منو؟
- هناك ثنائية بين المساح وكرومة ومن أغنياتهم :
(نسيم الصبا)، (زمانك)، (نغيم فاهك يا أمزين دواي شفاي البجبر قواي ) و ( إنت بدر السما في صفاك قولي من عيني مين خفاك)، و(الشاغلين فؤادي وتايهين فايقين)، والثنائية بين مهدي والريح .
* هل كانت توجد ثنائية بين شاعر وأكثر من فنان؟
- الثنائية بين الشاعر والفنان الملحن أحمد عبدالمطلب حدباي كان ملحن أو (راوية) لإشعار خليل فرح إضافة لكتابته للشعر ومن ألحانه:
( فوق جناين الشاطئ وبين قصور الروم حيى زهرة روما و أبكي يا مغروم شوف عناقيد ديسها تقول عنب في كروم) ، (ما هو عارف قدموا المفارق)، (تم دورو ودور) . والثنائية بين الشاعر والملحن حدباي والفنان كرومه من اغنياتهم:
(البصباها اسمعوا قولي بحكي نباهه) ، (زهر الرياض في غصونو ماح) .
* غير ثنائية حدباي في منو تاني؟
- ثنائية بين الشاعر أحمد حسين العمرابي والفنان محمد علي ودالجديد ومن أغنياتهم: 
(هب النسيم جاب لي طيب) ، (القماري قوقن) . والثنائية بين العمرابي والفنان ميرغني المأمون ومن أغنياتهم.
(انعشني نسام الصبا)، (سافر حبيب الروح)، (أندب حظي أم امالي ودهري قصدني مالو ومالي)، (خمرة هواك يا مي صافية وجلية هى اللآعبة بالألباب لا البابلية) .
* كلمنا عن ثنائية سيد وعبيد (شاعر وشاعر)؟
- كانوا ساكنين في حي واحد فريق العرب أصحاب وأعمارهم متقاربة ولما عملوا ديوان شعر وسموه ليالي زمان كان فيه شعر سيد عبدالعزيز وعبيد عبدالرحمن وكان من الصعب تفرز شعرأحدهم عن الآخر لأنه متشابه جداً .. يعني تسمع لعبيد (فتنت بيه عشقته ليه حبيتو ليه كان مالي وانا مالي بيه ) أو ( الشال منام عيني وفؤآدي جارحو لمتين يلاقيني وبهوآي أصارحوا) ما بتلقي أى فرق في المُفردات أو اللحن لما تقارنها بي كلام سيد زي :
(سيده وجمالها فريد) أو (يا قائد الاسطول) أو (حاول يخفي نفسو وهل يُخفي البدر في سماه .. أبداً وطبعاً لا لا .. ُشفناه .. شفناه) .
* الكورس كيف برضو في كورس (جوز) ثنائي؟
- أيوه .. الثنائي عبدالرحمن (حمامتي) وعلي (أبوالجوج) ديل كورس رسمي لأولآد المأمون وبغنوا مرات برآهم والثنائي محمود فلاح وعبدالله محمد ديل كورس لأولآد شمبات والثنائي حسن (كو) والطيب عدلآن ديل كورس لأولآد الموردة ، والثنائي محمود بخيت وعثمان عبدالرحمن (ضربه) ديل كورس كرومة.
* طيب كلمنا عن الثنائيات الحديثة والموجودة الآن؟
- أنا ذاتي بغني ثنائي مع فردتي خلف الله عبدالله ومن الثنائيات ناس حيدر وفؤاد وثنائي أبوكدوك وسعد ومحمود ثنائي أم بده وعبدالله يوسف وإبراهيم خليفة (شقيق سيد خليفة) ثنائي الدبيبة والتيمان حسن وحسين تيمان عطبرة.
* كلام أخير عن الثنائيات في الحقيبة؟
- الثنائيات ظلموهم وما أدوهم حقوقهم لا دولة أهتمت بيهم لا تلفزيون لا إذاعة، مثلاً عوض إبراهيم عوض عمل كتاب ذكر فيه كل المُبدعين عدا الثنائيات التلاتة والاذاعة في عيدها الذهبي برضوا ما أهتمت بي أولاد شمبات ولا الموردة ولا المأمون، ولولا جهدهم لضاعت أغانى الحقيبة واتمنى أن تنصفهم الصحافة.
* قبل الوداع كلمنا عن الثُلآثيات هل في فترة الحقيبة ظهرت ثلاثيات؟
- أول ثلاثي ظهر سنة 1936م وهم :
سرور وكرومة والأمين برهان وغنوا مع بعض في افتتاحية أول مسرحية سودانية، وهى( صور العصر) للكاتب الشاعر سيد عبدالعزيز . غنوا أغنية( فلق الصباح ) ووجدوا إشادة ورعاية من السيد عبدالرحمن المهدي . وقف معاهم وشجعهم وخلّي الناس تحب الغناء الجماعي ، يعني السيد عبدالرحمن المهدي كان راعياً للثقافة والفنون .
هذا اللقاء الثر مع "الدكشنرى" على مصطفى عنالثنائيات فقط فى أغنية الحقيبة يُعتبرُ غيض من فيض من مخزون هذا الرجُل الموسوعة ومازآل فى جُعبته الكثير عن أغنية الحقيبة وتاريخها ليُفيد به وهو مايُمكن أن تؤلف منه كُتُب .
المصدر: صحيفة الصحافة "الإرشيف "
أجرى اللقاء الأستاذ / محمد شريف مزمل 

ليست هناك تعليقات: